राजु गुरुङको उम्मेदवारी खारेज भएसंगै विष्णु पौडेललाई सहज Nepalpatra राजु गुरुङको उम्मेदवारी खारेज भएसंगै विष्णु पौडेललाई सहज
१२ मंसिर २०७९, सोमबार

राजु गुरुङको उम्मेदवारी खारेज भएसंगै विष्णु पौडेललाई सहज


विष्णु पौडेल र राजु गुरुङ

काठमाडौँ । सर्वोच्च अदालतले सत्ता गठबन्धनको तर्फबाट रुपन्देही क्षेत्र नम्वर २ का उम्मेदवार नेकपा (एकीकृत समाजवादी) का राजु गुरुङको उम्मेदवारी खारेज गरेको छ । सर्वोच्चका न्यायाधीशहरु कुमार रेग्मी र ईश्वरप्रसाद खतिवडाको संयुक्त इजलासले गुरुङ उम्मेदवारी कायम गरिपाउ भनी माग गर्दै दायर गरेको रिट खारेज गरेको हो ।

जिल्ला निर्वाचन अधिकृतको कार्यालयले गुरुङ कालो सूचीमा परेको भन्दै उनको उम्मेदवारी खारेज गरिदिएपछि गुरुङले सर्वोच्चमा रिट दायर गरेका थिए । गुरुङ कर्जा सूचना केन्द्रको कालोसूचीमा परेको भन्दै निर्वाचन अधिकृतको कार्यलयले उम्मेदवारी खारेज गरिदिएको थियो । यस्तै गुरुङको उम्मेदवारी, फौजदारी मुद्दामा सजाय पाएको र तीन वर्ष नपुगेको आधारमा कारण देखाउदै बदर गरिएको थियो ।

यसअघि सर्वोच्चले गठबन्धन उम्मेदवार गुरुङको रिटमा प्रारम्भिक सुनुवाइ गर्दै उम्मेदवारी खारेज नगर्न आदेश दिएको थियो । सर्वोच्चले गुरुङको उम्मेदवारी खारेज गर्ने निर्णय तत्काल कार्यान्वयन नगर्न अल्पकालीन अन्तरिम आदेश जारी गरेको थियो ।

गुरुङसँगै आगामी मंसिर ४ गते हुन लागेको प्रतिनिधिसभा निर्वाचनमा रुपन्देही क्षेत्र नं २ मा नै उम्मेदवारी दिएका हाम्रो नेपाली पार्टीका उम्मेदवार डा. निकोलस भुसाल भनिने कमल भुसालको पनि उम्मेदवारी खारेज भएको छ । सरकारी सुविधा लिइरहेकै अवस्थामा उनी उम्मेदवार बनेका थिए । चिकित्साशास्त्र अध्ययन संस्थानमा सरकारी छात्रवृत्तिमा अध्ययनरत भुसाल चुनाव लड्न नपाउने भएका हुन् ।

सोही निर्वाचन क्षेत्रमा नेकपा एमालेबाट भने उपाध्यक्ष विष्णु पौडेलको उम्मेदवारी दिएका छन् । सर्वोच्चको यो आदेशसंगै रुपन्देही-२ मा सत्ता गठबन्धन उम्मेदवारविहीन हुने भएको छ ।

एमालेका पौडेलविरुद्ध गुरुङले उम्मेदवारी दिएका गुरुङ र भुसालको उम्मेदवारी खारेज भएसंगै पौडेललाई चुनाव जित्न सहज भएको छ । यसअघि २०७४ सालको प्रतिनिधिसभाको निर्वाचनमा पनि पौडेल उक्त निर्वाचन क्षेत्रबाट विजयी भएका थिए ।

२०७४ सालको निर्वाचनमा रुपन्देही-२ मा वाम गठवन्धनबाट उम्मेदवार पौडेल २२०६३ मतान्तरले विजयी भएका थिए । उनले ४४००९ मत ल्याएर विजयी भएका थिए । उनका निकटम प्रतिद्वन्द्वी लोकतान्त्रिक गठवन्धनका तर्फबाट नेपाली काँग्रेसका युवराज गिरीले २१९४६ मत ल्याएका थिए ।

पौडेलले गिरी भन्दा दोब्बर भन्दा बढी मत प्राप्त गरेका थिए । ‘भाग्यमानीको भुतै कमारो’ भनेझैँ २०७४ सालमा प्रतिनिधिसभा सदस्यमा निर्वाचित भएका एमालेका पौडेल लगातार तेश्रो पटक सो क्षेत्रबाट (२०६४, २०७० र २०७४) निर्वाचित भएका थिए । उनीविरुद्ध उठेका दुई जनाको उम्मेदवारी खारेज भएसंगै यसपटक पनि विगतमा नेकपाको महासचिव समेत भइसकेका पौडेलको जित लगभग सुनिश्चित जस्तै भएको हो ।

यो पनि पढ्नुहोस्

राजु गुरुङको मुद्दा खारेज, अव उम्मेदवार हुने नपाउने


यो समाचार पढेर तपाईको प्रतिक्रिया के छ ?

प्रतिक्रिया दिनुहोस !