काठमाडौँ । लोकतान्त्रिक समाजवादी पार्टी नेपाल (लोसपा) को कार्यकारिणी समितिको बैठक आज पनि बस्दै छ । लोसपाको केन्द्रीय कार्यालय बबरमहलमा हिजो बुधबारबाट शुरु भएको कार्यकारिणी समितिको बैठक आज दिउँसो १ बजे पुन: बस्ने भएको हो ।
हिजो बुधबारको बैठकमा आसन्न स्थानीय तहको निर्वाचनमा तालमेलका विषयमा कार्यकारिणी सदस्यहरूले आफ्नो धारणा राखेका थिए । हिजोको बैठकमा स्थानीय तहको निर्वाचन र निर्वाचन आयोगले परिमार्जन गर्न भनेको विषयमा छलफल भएको थियो । बैठकमा निर्वाचनका बारेमा नेताहरूले बोल्ने क्रम नसकिएकोले आज पनि बोल्ने प्रक्रिया जारी रहेको हो ।
बैठकमा स्थानीय तह निर्वाचनका लागि उम्मेदवार छनोट प्रक्रिया र रणनीति, निर्वाचनमा टिकट वितरण गर्ने अधिकार, चुनावी घोषणापत्र, पार्टीको विधान संशोधन लगायत एजेण्डा प्रस्तुत भएको छ । जारी बैठकमा समसामयिक राजनीतिको विषयमा पनि छलफल भई रहेको छ ।
बाहिर नबताएपनि शेरबहादुर देउवा नेतृत्वको वर्तमान संघीय सरकारमा सहभागी हुनेबारे पनि आज छलफल हुनसक्ने बुझिएको छ । बैठकमा देउवा नेतृत्वको वर्तमान सरकारमा सहभागी हुने या नहुने भन्ने विषयमा छलफल गरेर निर्णय लिइन सक्ने बुझिएको हो ।
प्रधानमन्त्री देउवाले आफ्नो नेतृत्वको वर्तमान सरकारमा सहभागी लागि सकारात्मक भएर अनुरोध गरेपछि लोसपाले पार्टीमा छलफल गरेर निर्णय लिने भएको हो । देउवाको प्रस्तावपछि लोसपाका केही नेताले स्थानीय तहको चुनावअघि नै सरकारमा सहभागी हुनुपर्ने बताएका छन् ।
पार्टीमा छलफल भएर निर्णय भएपछि कतिवटा मन्त्रालय लिने, कुन कुन मन्त्रालय लिने लगायतको विषयमा लोसपाले प्रधानमन्त्री देउवासँग छलफल गर्ने भएको छ । अहिलेको रिक्त रहेका रक्षा मन्त्रालय र उद्योग वाणिज्य तथा आपूर्ति मन्त्रालय प्रधानमन्त्री देउवाले आफैंसंग राखेका छन् ।
रिक्त रहेका यी दुइ वटै मन्त्रालय लोसपाले पाउने प्रवल सम्भावना रहेको छ । यद्यपि लोसपाले सरकारमा सहभागी हुने निर्णय गरेमा मन्त्रिमण्डल पुनर्गठन गरेरै भएपनि सरकारमा सहभागी गराउन देउवा तयार भएका छन् ।
