बुटवल । नेपाली काँग्रेसको १४औँ महाधिवेशनअन्तर्गत लुम्बिनी प्रदेशको सभापतिमा संस्थापन इतर समूहका अमरसिंह पुन विजयी भएका छन् । संस्थापन शेरबहादुर देउवा पक्षका भरतकुमार शाहलाई पराजित गर्दै रामचन्द्र पौडेल पक्षबाट उम्मेदवार बनेका पुन विजयी भएका हुन ।
लुम्बिनी प्रदेशको सभापति पदमा पुनले ८५२, उनका निकटतम प्रतिद्वन्द्वी शाहले ७६७ मत प्राप्त गरेका छन् । पुनले शाहलाई ८५ मतको अन्तरले पराजित गरेका हुन् । पदाधिकारीमा एक उपसभापति बाहेक सबै पुन प्यानलका उम्मेदवार विजयी भएका छन् ।
प्रदेश अधिवेशनमा १६३१ मत खसेको थियो । काँग्रेस प्रदेश सभापतिमा निर्वाचित पुन पूर्व राज्यमन्त्री, संविधान सदस्य एवं नेपाली कांग्रेस रोल्पाका निवर्तमान सभापति हुन् भने शाह संघीय संसदको सार्वजनिक लेखा समिति सभापतिसमेत हुन् ।
उपसभापतिमा पुन समूहका भुवनप्रसाद श्रेष्ठ र शाह समूहका राजु खनाल निर्वाचित भएका छन् । श्रेष्ठले ८४७ मत प्राप्त गरेका छन् भने खनालले ७९२ मत प्राप्त गरेका हुन् । यस्तै महामन्त्रीमा पनि पुन समूहकै विक्रम खनाल र सुरेन्द्रराज आर्चाय निर्वाचित भएका छन् । खनालले ८४४ र आर्चायले ८३९ मत प्राप्त गर्दै विजयी भएका हुन् ।
त्यस्तै सहमहामन्त्रीमा विष्णु खनाल मुस्कान र खगराज पाण्डेय विजयी भएका छन् । खनालले सर्वाधिक ८६९ मत प्राप्त गरेका छन् भने पाण्डेयले ७७६ मत प्राप्त गरेका हुन् । महिला सहमहामन्त्रीमा निमा गिरीले ८३० मत प्राप्त गरी विजयी भएकी छन् ।
यो पनि पढ्नुहोस्
