राप्रपाको नयाँ नेतृत्व चयनका लागि आज निर्वाचन हुँदै Nepalpatra राप्रपाको नयाँ नेतृत्व चयनका लागि आज निर्वाचन हुँदै
१३ माघ २०७८, बिहिबार

राप्रपाको नयाँ नेतृत्व चयनका लागि आज निर्वाचन हुँदै


कमल थापा र राजेन्द्र लिङ्देन

काठमाडौं । राष्ट्रिय प्रजातन्त्र पार्टी (राप्रपा) को नयाँ नेतृत्व चयनका लागि आज निर्वाचन हुँदैछ । आज बिहान ८ बजेदेखि ५ बजेसम्म निर्वाचनको कार्यतालिका राखिएको छ ।

काठमाडौँको भृकुटीमण्डपमा जारी महाधिवेशनमा कमल थापा र राजेन्द्र लिङ्देनले अध्यक्षका लागि उम्मेदवारी हिजो दर्ता गराएका थिए । भृकुटीमण्डपस्थित पार्टीको निर्वाचन समितिको कार्यालय पुगी थापा र लिङ्देन दुवैले हिजो आ-आफ्नो प्यानलसहित दर्ता गराएका थिए ।

अध्यक्षका उम्मेदवार थापाको प्यानलबाट उपाध्यक्षमा बुद्धिमान तामाङ, विक्रम पाण्डे, ध्रुवबहादुर प्रधान र रोशन कार्की उम्मेदवार रहेका छन् भने महामन्त्रीमा भास्कर भद्रा, भुवन पाठक र कुन्तिकुमारी शाही रहेका छन् ।

यस्तै लिङ्देन प्यानलको उपाध्यक्षमा विक्रम पाण्डे, दिलविकास राजभण्डारी, रामचन्द्र राय र लीला श्रेष्ठ उम्मेदवार बनेका छन् । महामन्त्रीमा धवलशम्शेर राणा, श्याम तिमिल्सिना र रेखा थापा उम्मेदवार छन् ।

यद्यपि उपाध्यक्षमा विक्रम पाण्डे भने दुवै प्यानलका साझा उम्मेदवार बनेका छन् । राप्रपाको एकता महाधिवेशनमा १९९ सदस्यीय नयाँ कार्यसमितिका लागि २६६ जनाले उम्मेदवारी दर्ता गरएका छन् ।

महाधिवेशनबाट १ जना अध्यक्ष, ४ जना उपाध्यक्ष, ३ जना महामन्त्री गरी ८ जना पदाधिकारीसहित उपाध्यक्ष र महामन्त्रीमा कम्तीमा १ जना महिला निर्वाचित गर्ने व्यवस्था गरिएको छ ।

त्यसैगरी ४ जना उपाध्यक्ष, ३ जना महामन्त्रीका साथै अन्य केही पदाधिकारी नयाँ कार्य समितिले मनोनीत गर्नेछ । बन्दसत्रमा प्रस्तुत भएका सामाजिक, आर्थिक र राजनीतिक प्रस्तावका साथै संशोधित विधान पारित भएकोे जनाइएको छ ।

राप्रपाको सदस्य पदमा १९६ जनाको उम्मेदवारी परेपनि १४१ जना चुनिनेछन् । राप्रपामा नयाँ नेतृत्व चयनका लागि मतदान भने आज बिहान हुने बताइएको छ । अध्यक्ष पदका लागि कागजी मतपत्र र अरू पदका लागि विद्युतीय भोटिङ मेसिनको प्रयोग हुने भएको जनाइएको छ ।

उम्मेदवारी दर्ताबाट करिब ५० लाख सङ्कलन भएको जनाइएको छ । करिब दुई वर्ष अगाडि राप्रपा र राप्रपा (संयुक्त) को एकतापछि पहिलो पटक हुन लागेको उक्त अधिवेशनमा यसपटक नेतृत्वका लागि तीव्र प्रतिस्पर्धा देखिएको छ । देशभरबाट ४७०० प्रतिनिधि छनोट भएका छन् ।


यो समाचार पढेर तपाईको प्रतिक्रिया के छ ?

प्रतिक्रिया दिनुहोस !