एमाले अध्यक्षमा केपी शर्मा ओली भारी मतले दोस्रो पटक निर्वाचित Nepalpatra एमाले अध्यक्षमा केपी शर्मा ओली भारी मतले दोस्रो पटक निर्वाचित
१५ माघ २०७८, शनिबार

एमाले अध्यक्षमा केपी शर्मा ओली भारी मतले दोस्रो पटक निर्वाचित


केपी शर्मा ओली फाइल फोटो

सौराहा । प्रमुख प्रतिपक्ष दल नेकपा एमालेको अध्यक्षमा केपी शर्मा ओली फराकिलो मतान्तरसहित पुनः निर्वाचित भएका छन् । चितवनमा भएको एमालेको १० औं राष्ट्रिय महाधिवेशनमा नयाँ नेतृत्व चयनका लागि भएको निर्वाचनमा अध्यक्ष पदका अर्का उम्मेद्वार भीम रावललाई हराएर ओली विजय भएका हुन् ।

ओलीले १८३७ मत प्राप्त गरी विजयी भएका छन् भने उनका अध्यक्षका प्रतिस्पर्धी रावलले २२३ मत प्राप्त गरे । एमाले निर्वाचन आयोगका सदस्य बाबुराम दाहालका अनुसार कुल २१५३ मतदातामध्ये २०९६ मत खसेको छ । कतिपय प्रतिनिधिले अध्यक्षका दुवै उम्मेदवारलाई मत दिएको बुझिएको छ ।

ओली दोस्रो पटक एमालेको अध्यक्षमा निर्वाचित भएका हुन् । यसअघि एमालेको नवौं‌ महाधिवेशनमा नयाँ नेतृत्वका लागि भएको निर्वाचनबाट अध्यक्षमा ओलीले अध्यक्ष पदका अर्का प्रत्यासी माधवकुमार नेपाललाई हराएका थिए । यस्तै एमालेको आठौं महाधिवेशनमा झलनाथ खनालसँग ओली पराजित भएका थिए ।

यसपटक एमाले निर्वाचनमा विद्युतीय मेसिनबाट इलेक्ट्रोनिक भोटिङको ब्यबस्था गरिएकोले मतदान र गणनाका कारण छिटै परिणाम निस्किएको हो । एक पटकमा ६९ जनाले मतदान गर्ने व्यवस्था मिलाइएको थियो ।

वरिष्ठ उपाध्यक्षमा ईश्वर पोखरेल, महासचिवमा शङकर पोखरेल लगायत पदाधिकारी भने निर्विरोध निर्वाचित भएका छन् । तीन उपमहासचिवमा प्रदीपकुमार ज्ञवाली, पृथ्वीसुब्बा गुरुङ र विष्णु रिमाल पनि निर्विरोध निर्वाचित भएका छन् ।

महाधिवेशनको बन्दसत्रको पहिलो दिन यही मङ्सिर ११ गते अध्यक्ष मण्डलका अध्यक्ष ओलीलाई ३०१ सदस्यीय केन्द्रीय कमिटीका पदाधिकारी र सदस्यका उम्मेदवारको नामावली प्रस्तुत गर्न अधिकार दिएको थियो ।

अध्यक्ष ओलीले विभिन्न नेताहरुसँगको परामर्शमा १२ गतेको बन्दसत्रमा नामावली प्रस्तुत गर्दा अधिकांशले सहमति जनाएकामा डा. रावल, नेता घनश्याम भुसाललगायतका नेताले अस्वीकार गरेपछि निर्वाचन भएको हो ।

उपाध्यक्ष पदमा हलमा प्रस्तुत भएको नामावली अतिरिक्त उम्मेदवारी दिएका भुसाल अन्य उम्मेवारका तुलनामा पछि परेका छन् । नयाँ केन्द्रीय कमिटीको शपथ ग्रहण र पहिलो बैठक आजै सौराहामा हुँदैछ ।

यो पनि पढ्नुहोस्

एमालेको मतगणना जारी, फराकिलो मतान्तरले ओलीको अग्रता कायमै

एमाले निर्वाचन मत परिणाम : अध्यक्षमा ओलीले ल्याए ४०० मत, रावलको ४२ मात्र


यो समाचार पढेर तपाईको प्रतिक्रिया के छ ?

प्रतिक्रिया दिनुहोस !