सुर्खेत । कर्णाली प्रदेशका नवनियुक्त मुख्यमन्त्री जीवनबहादुर शाहीले शपथ लिएका छन् । मुख्यमन्त्री शाहीलाई प्रदेश प्रमुख गोविन्दप्रसाद कलौनीले आज राती पद तथा गोपनीयताको शपथ गराएका हुन् ।
नेपाली काँग्रेस कर्णाली प्रदेशका संसदीय दलका नेता शाही आजै मात्र मुख्यमन्त्रीमा नियुक्त भएका हुन् । शाहीलाई प्रदेश प्रमुख कलौनीले आजै मंगलबार मात्र नेपालको संविधानको धाारा १६८ को उपधारा (२) अनुसार मुख्यमन्त्रीमा नियुक्त गरेका थिए ।
प्रदेश प्रमुख कलौनीले प्रदेशसभामा कुनै पनि दलको स्पष्ट बहुमत नरहेको अवस्थामा दुई वा दुईभन्दा बढी दलको समर्थनमा बहुमत प्राप्त गर्न सक्ने सदस्यलाई आज साँझ ७:३० बजेभित्र मुख्यमन्त्री पदमा नियुक्तिका लागि दाबी पेश गर्न आह्वान गरेपछि शाहीले दाबी पेश गरेका थिए ।
शाहीले नेपाली कांग्रेस, नेकपा माओवादी केन्द्र र नेकपा (एकीकृत समाजवादी) का प्रदेशसभा सदस्यको समर्थनमा नेपालको संविधान २०७२ को धारा १६८ को उपधारा (२) अनुसार प्रदेश प्रमुख कलौनी समक्ष मुख्यमन्त्रीमा दावी पेश गरेका थिए ।
उनले माओवादी केन्द्रबाट १२ जना, कांग्रेसबाट ६ जना, एकीकृत समाजवादीबाट ३ जना गरेर २१ सांसदको हस्ताक्षरसहित मुख्यमन्त्रीको दाबी पेश गरेका थिए । कर्णाली प्रदेशसभा हाल ३५ सदस्यीय रहेकाले मुख्यमन्त्रीमा दावी पेश गर्न १८ सांसदको समर्थन भए पुग्छ ।
शाहीले शपथपछि आजै कार्यभार सम्हाल्ने भएका छन् । मुख्यमन्त्रीमा नियुक्त भएपछि शाहीले कर्णालीको समग्र विकास गर्दै नागरिकलाई सम्पन्न बनाउने अभियानमा जुट्ने आफ्नो सरकारको प्रमुख प्राथमिकता हुने बताएका छन् ।
यो पनि पढ्नुहोस्
कर्णाली प्रदेशको मुख्यमन्त्रीमा जीवनबहादुर शाही नियुक्त
कर्णालीको मुख्यमन्त्रीमा जीवनबहादुर शाहीद्वारा दावी पेश
कर्णाली प्रदेश प्रमुखद्वारा मुख्यमन्त्रीको दाबी पेश गर्न आह्वान
कर्णालीमा काँग्रेसका जीवनबहादुर शाहीलाई मुख्यमन्त्री बन्ने बाटो खुल्यो
