फाइल फोटो
काठमाडौँ। प्रधानमन्त्री समेत रहेका नेपाली काँग्रेसका सभापति शेरबहादुर देउवा निवास बुढानीलकण्ठमा क्रियाशील सदस्यता विवाद मिलाउन कांग्रेस शीर्ष नेताहरूको बैठक जारी रहेको छ ।
आज दिउँसो २ बजेदेखि जारी बैठकमा सभापति देउवा, काँग्रेस बरिष्ठ नेता रामचन्द्र पौडेल र पूर्वमहामन्त्री कृष्ण सिटौला सहभागी भएका छन् भने क्रियाशील सदस्यता छानबिन समितिको संयोजक रहेका रमेश लेखक र नेता मिनेन्द्र रिजाल पनि छलफलमा समेत सहभागी छन् ।
पार्टीका केन्द्रीय सदस्य लेखकको संयोजकत्वमा गठित समितिमा केन्द्रीय सदस्यहरु आनन्द ढुङ्गाना, जीवन परियार, श्यामकुमार घिमिरे, प्रदीप पौडेल, कल्याण गुरुङ र योगेन्द्र चौधरी सदस्य थिए ।
कांग्रेस क्रियाशील सदस्यता छानविन समितिले श्रावण १४ गते बिहिबार पार्टी पदाधिकारी र पूर्वपदाधिकारी बैठकमा क्रियाशील सदस्यता विवरण सम्बन्धी प्रतिवेदन बुझाएको थियो । तर उक्त समितिले प्रतिवेदन बुझाउँदा विभिन्न जिल्लाको क्रियाशील विवाद समाधान नगरी बुझाएको थियो ।
समितिले विवाद मिलाउन नसकेपछि शीर्ष तीन नेताले सो जिम्मा पाएका छन् । कांग्रेसको आसन्न १४ औँ महाधिवेशन भदौ १६ गते गर्ने गरी मिति तोकिएपनि क्रियाशील सदस्यताको विवादले महाधिवेशन सर्न सक्ने प्रवल सम्भावना देखिएको छ ।
