न्यूनतम साझा कार्यक्रमपछि मात्रै मन्त्रिपरिषद् विस्तार गर्ने सहमति Nepalpatra न्यूनतम साझा कार्यक्रमपछि मात्रै मन्त्रिपरिषद् विस्तार गर्ने सहमति
२२ मंसिर २०७९, बिहिबार

न्यूनतम साझा कार्यक्रमपछि मात्रै मन्त्रिपरिषद् विस्तार गर्ने सहमति


सत्ता गठबन्धनको निर्णय फाइल फोटो

काठमाडाैं । प्रधानमन्त्रीको सरकारी निवास बालुवाटारमा प्रधानमन्त्रीसहित सत्ता गठबन्धनका शीर्ष नेताको बैठकमा सरकारका न्यूनतम साझा कार्यक्रम ल्याएपछि मात्र मन्त्रिपरिषद विस्तार गर्ने सहमति भएको छ ।

मन्त्रिपरिषद् विस्तारबारे छलफल गर्न सत्तारुढ नेपाली कांग्रेस, नेकपा माओवादी केन्द्र र जनता समाजवादी पार्टीका शीर्ष नेताको बैठकले मंगलबारसम्म न्युनतम साझा कार्यक्रम सार्वजनिक गर्ने र त्यसपछि मन्त्रिपरिषद विस्तार गर्ने सहमति भएको हो ।

आज सोमबार प्रधानमन्त्री शेरबहादुर देउवा, नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ र जनता समाजवादी पार्टीका अध्यक्ष उपेन्द्र यादवबीच भएको छलफलमा यस्तो सहमति भएको हो ।

सत्तारुढ दल निकट कार्यदलले भोलि मंगलबारसम्म सरकारका न्यूनतम साझा कार्यक्रम शीर्ष नेतालाई बुझाउने तयारी गरेको छ । कार्यक्रममा संयुक्त सरकारका प्राथमिकता, सरकारका नीति तथा कार्यक्रम, संघीयता कार्यान्वयन लगायतका विषय समेट्ने तयारी गरिएकाे छ ।

मन्त्रिपरिषद् विस्तारमा ढिलाइ भएको भनेर बाहिर चर्को आलोचना भई रहेको बेला सत्तारुढ गठबन्धनका शीर्ष नेताहरु छलफलमा जुटेका छन् । जारी छलफलमा मन्त्रिपरिषद विस्तार र दलहरुबीच मन्त्रालय बाँडफाँटका विषयमा छलफल हुने बालुवाटार स्रोतले जानकारी दिएको छ ।

आजै मात्र सत्तारुढ गठबन्धनको कार्यदलको बैठक बसेको बैठकले सरकार सञ्चालनका सन्दर्भमा तीन वटा विषयमा डकुमेन्ट ड्राफ्ट गरेको थियो । काँग्रेस महामन्त्री पूर्णबहादुर खड्का नेतृत्वको काँग्रेस, माओवादी र जसपा सम्मिलित कार्यदलले सरकार सञ्चालनका सन्दर्भमा सैद्धान्तिक सहमति जुटाउने प्रयास गरिरहँदा तीन विषयमा डकुमेन्ट ड्राफ्ट गरेको हो ।

कार्यदलका सदस्य रमेश लेखकका अनुसार ड्राफ्ट गरिएका तीन वटा डकुमेन्टमा न्युनतम साझा कार्यक्रम, सरकार सञ्चालनको कार्यविधि र आचारसंहिताको सवाल रहेको छ । यसबारे कार्यदलमा थप छलफल चलिरहेको र छिटै अन्तिम रुप दिइनेछ ।


यो समाचार पढेर तपाईको प्रतिक्रिया के छ ?

प्रतिक्रिया दिनुहोस !