मन्त्रीहरुको नाम टुंगो लगाउन जसपाको यादव पक्षको बैठक बस्दै Nepalpatra मन्त्रीहरुको नाम टुंगो लगाउन जसपाको यादव पक्षको बैठक बस्दै
२१ आश्विन २०७९, शुक्रबार

मन्त्रीहरुको नाम टुंगो लगाउन जसपाको यादव पक्षको बैठक बस्दै


उपेन्द्र यादव-बाबुराम भट्टराई

काठमाडौं । जनता समाजवादी पार्टी (जसपा) को उपेन्द्र यादव-बाबुराम भट्टराई पक्षको बैठक बस्दै छ । सर्वोच्च अदालतको आदेशअनुसार प्रधानमन्त्री बन्न लागेका नेपाली काँग्रेसका सभापति शेरबहादुर देउवाको सरकारमा जसपाको यादव-भट्टराई पक्षवाट सहभागी हुने मन्त्रीहरुको नाम टुंगो लगाउन बैठक बस्न लागेको हो ।

देउवा नेतृत्वको बन्न लागेको सरकारमा पठाउने मन्त्रीबारे छलफल गर्न उपलब्ध केन्द्रीय कार्यकारिणी समिति सदस्यहरुको बैठक दिउँसो १ बजे बस्ने भएको हो । जसपा अध्यक्ष उपेन्द्र यादव उपप्रधानमन्त्रीसहित परराष्ट्र मन्त्री बन्ने चर्चा भए पनि अहिलेसम्म टुंगो लागिसकेको छैन ।

कांग्रेस सभापति शेरबहादुर देउवाले सकेसम्म आजै जसपालाई समेत समेटेर सानो आकारको मन्त्रीमण्डल बनाउने तयारी गरेका छन् । देउवाले आज साँझ ५ बजे प्रधानमन्त्री पदको शपथ ग्रहण गर्दैछन् । आज बिहानैदेखि सरकारमा कस-कसलाई पठाउने भन्ने बारेमा निर्णय गर्न कांग्रेस, माओवादी केन्द्र र जसपाका नेताहरु व्यस्त रहेका छन् ।

हिजो सोमबार सर्वोच्चले आज मंगलबार अपरान्ह ५ बजेभित्र देउवालाई प्रधानमन्त्रीको सपथ गराउन आदेश दिएको थियो । राष्ट्रपति विद्यादेवी भण्डारीले कांग्रेस सभापति देउवालाई आज मंगलबार प्रधानमन्त्री नियुक्त गर्ने भएकी छन् ।

अदालतले २८ घण्टाभित्र देउवालाई प्रधानमन्त्री नियुक्त गर्न हिजो सोमबार परमादेश दिएपछि राष्ट्रपतिले प्रधानमन्त्री नियुक्ति र शपथबारे देउवालाई जानकारी गराएकी हुन् ।


यो समाचार पढेर तपाईको प्रतिक्रिया के छ ?

प्रतिक्रिया दिनुहोस !