फाइल फोटो 
पोखरा। गण्डकी प्रदेशमा विश्वासको मत प्राप्त गने नसकेर पदमुक्त भएका मुख्यमन्त्री पृथ्वीसुब्बा गुरुङले पनि मुख्यमन्त्रीमा दाबी गरेका छन् । उनले आफ्नो दाबीमा जनता समाजवादी पार्टी (जसपा) को प्रदेश समिति र जनमोर्चाका सांसद कृष्ण थापाको साथ रहेको उल्लेख गरेका छन् ।
तर, जनता समाजवादीका सांसदहरू भने आफूहरूको समर्थन विपक्षीलाई रहेको बताइरहेका छन् । जसपाको प्रदेश समितिले मुख्यमन्त्रीमा पृथ्वीसुब्बालाई साथ रहेको पत्र प्रदेश प्रमुखलाई दिएको थियो ।
विश्वासको मत दिने बेलामा तटस्थ बसेका जनमोर्चा सांसद कृष्ण थापाले आफ्नो साथ अहिलेकै सरकारलाई रहेको बताएको भन्दै दाबी पेस गरेका हुन् । तर, विपक्षीले भने सांसदलाई नै उपस्थित गराएर दाबी पेश गरेको छ ।
गण्डकीका मुख्यमन्त्री गुरुङले विश्वासको मत नपाएर पदमुक्त भएसँगै गण्डकी प्रदेशमा एमाले नेतृत्वको सरकार ढलेको थियो । मुख्यमन्त्री गुरुङले जेठ २७ गते बिहिबार प्रदेशसभाबाट विश्वासको मत प्राप्त गर्न असमर्थ भएका थिए ।
प्रदेशसभामा उनले विश्वासको मतका लागि प्रस्ताव पेश गरेको र सभामा निर्णायार्थ पेश गर्दा पक्षमा २७ र विपक्षमा ३० मत प्राप्त भएको सभामुख नेत्रनाथ अधिकारीले घोषणा गरेका थिए ।
गण्डकी प्रदेशसभामा कूल ६० सदस्य रहेकामा विश्वासको मतका लागि ३१ सदस्यको समर्थन आवश्यक पर्दथ्यो । बैठकमा ५८ प्रदेशसभा सदस्य उपस्थित भएकामा मतदान प्रक्रियामा ५७ जना सहभागी हुनाका साथै १ जना तटस्थ रहे । मनाङ, प्रदेशसभा निर्वाचन क्षेत्र ख बाट निर्वाचित तत्कालिन युवा तथा खेलकूदमन्त्री राजीव गुरुङ मतदान प्रक्रियामा अनुपस्थित भएका थिए ।
गुरुङले बिहीबार प्रदेशसभामा विश्वासको मत प्राप्त गर्न नसकेपछि प्रदेश प्रमुख पौडेलले २४ घण्टाभित्र नयाँ सरकार गठनका लागि आह्वान गरेकी थिइन् । प्रदेश प्रमुखले बहुमतसहित सरकार गठन दावीका लागि आज २९ गते शनिबार अपराह्न ३ बजेसम्मको समयसीमा दिएकी थिइन् ।
