काठमाडौं । राष्ट्रिय प्रजातन्त्र पार्टी (राप्रपा) का अध्यक्ष कमल थापाले मेलम्चीबाट पानी ल्याई काठमाडौँका जनताको घर-घरमा पुर्याउने आयोजनाको परिकल्पना राजा विरेन्द्रको भएको तर पछि कृष्ण प्रसाद भट्टराईले मुखरित गरेको इतिहासको दृष्टान्त प्रस्तुत गरेका छन् ।
आज दिउसो सामाजिक संजाल ट्वीटरमा लेख्दै उनले यस प्रसंगमा राजा बीरेन्द्रको नाम उल्लेख गर्दा हिनताबोध गर्नु जरुरी नभएको भन्दै कसैले चाहेर पनि नेपाली इतिहासबाट राजाको नाम र योगदान मेटाउन नसक्ने बताएका छन् ।
उनले लेखेका छन्, ‘मेलम्चीबाट पानी ल्याई काठमाडौँका जनताको घर घरमा पुर्याउने आयोजनाको परिकल्पना राजा बिरेन्द्रको हो । पछि किसुनजीले मुखरित गर्नुभयो । यस प्रसंगमा राजा बीरेन्द्रको नाम उल्लेख गर्दा हिनताबोध गर्नु जरुरी छैन । कसैले चाहेर पनि नेपाली इतिहासबाट राजाको नाम र योगदान मेटाउन सक्दैनन् ।’
मेलम्चीको पानी र दिवंगत पूर्वप्रधानमन्त्री कृष्ण प्रसाद भट्टराईको नाम परिपूरक हुन् । जहाँ मेलम्चीको पानीको कुरा आउछ त्यहाँ पूर्वप्रधानमन्त्री कृष्ण प्रसाद भट्टराईको नाम आईहाल्छ ।
अझ नेपाली काँग्रेसले त मेलम्चीको पानीसँग कृष्ण प्रसाद भट्टराईको नाम जोडेर आगामी निर्वाचनमा एजेण्डा प्रस्तुत गर्ने सोच बनाईरहेको बेला थापाको ट्वीटले काँग्रेसका नेताको मुटुमा छुरा हानेको छ ।
मेलम्ची खानेपानीको काठमाडौंको भृकुटीमण्डपमा नवनिर्मित ३ वटा सार्वजनिक ढुंगेधाराको टुटी खोलेर राष्ट्रपति विद्यादेवी भण्डारीले मेलम्चीको खानेपानीको औपचारिक उद्घाटन गरेकी हुन् । झण्डै ३ दशकको प्रयासमा सफल हुँदा राष्ट्रपति भण्डारीले कृष्णप्रसाद भट्ट्टराईलाई सम्झिइन् ।
तर राष्ट्रपति भण्डारीअघि बोलेका प्रधानमन्त्री केपी शर्मा ओलीले भने आयोजनाका विषयलाई लिएर कृष्णप्रसाद भट्टराईलाई सम्झिएनन् । ३ दशक पुरानो आयोजनालाई पूरा गर्न आफूहरुले तीव्र प्रयास गरेको प्रधानमन्त्री ओलीले बताए ।
यसरी मेलम्ची खानेपानीको बारेमा आफ्नो क्रेडिट लिन प्रधानमन्त्री ओली, नेकपा एमाले र नेपाली काँग्रेसको होडबाजी चलिरहेको बेला थापाको यस्तो ट्वीट बाहिर आएको हो ।
मेलम्चीबाट पानी ल्याई काठमाडौँका जनताको घर घरमा पुर्याउने आयोजनाको परिकल्पना राजा बिरेन्द्रको हो।पछि किसुनजीले मुखरित गर्नुभयो।
यस प्रसंगमा राजा बीरेन्द्रको नाम उल्लेख गर्दा हिनताबोध गर्नु जरुरी छैन। कसैले चाहेर पनि नेपाली इतिहासबाट राजाको नाम र योगदान मेटाउन सक्दैनन् https://t.co/WOsZFFJMJV— Kamal Thapa (@KTnepal) April 2, 2021
