बाँकेको डुडुवामा बाढी, नेपालगञ्ज डुबानमा Nepalpatra बाँकेको डुडुवामा बाढी, नेपालगञ्ज डुबानमा

१८ श्रावण २०७८, सोमबार

बाँकेको डुडुवामा बाढी, नेपालगञ्ज डुबानमा


बाँके

नीरज गौतम, नेपालगञ्ज, २५ असार । दुई दिनदेखिको अविरल वर्षाका कारण बाँकेको डुडुवा गाउँपालिकामा आएको बाढीले बेतहनी सडकखण्डको कजवे डुबाएको छ ।

सो गाउँपालिका–२ स्थित कजवे डुुुबाउँदा साइकल तथा मोटरसाइकल ओहोरदोहोर गर्नसमेत अप्ठ्यारो भएको गाउँपालिकाका अध्यक्ष नरेन्द्रकुमार चौधरीले बताउनुभयो ।

बाढीले धान रोप्न तयारी अवस्थामा रहेका खेतसमेत डुबाएको छ भने धानको ब्याडमा पनि क्षति पु¥याएको छ । सोमबार र मङ्गलबार रातभरि परेको पानीले डुडुवामा बाढी आउँदा डुडुवा गाउँपालिकाको बेतहनीमा केही घरसमेत डुबानमा परेको अध्यक्ष चौधरीले बताउनुभयो । बाढीका कारण सो गाउँपालिकाको वडा नं ३ राजारामपूर्वाका मोलहे अहिरका तीन भैँसी मरेका छन् । भैैँसीलाई बाढीले बगाएको थियो ।

यसैबीच जिल्ला विपद् व्यवस्थापन समितिले बाँकेको राप्ती नदीमा बाढी आउन सक्ने सम्भावनाका कारण नदी तटीय क्षेत्रका नागरिकलाई सतर्क रहन आग्रह गरेको प्रमुख जिल्ला अधिकारी मदन भुजेलले जानकारी गराउनुभयो ।

यसैगरी नेपालगञ्जमा परेको दुई दिन देखिको अविरल वर्षाका कारण नगरका होचा बस्ती डुबानमा परेका छन् । ढल तथा नालाको निकास थुनिँदा नेपालगञ्ज उपमहानगरपालिकाका विभिन्न वडा डुबानमा परेका हुन् । नालाको निकास नहुँदा स्थानीय बेलासपुर, रानी तलाउ, महेन्द्रपार्क, घरबारीटोल, बेलासपुर, न्यूरोड, गणेशपुर, बाँकेगाउँ, कोरियनपुर, भृकुटीनगर, कारकाँदो, राँझालगायत क्षेत्र जलाम्य भएका छन् ।

ढलको निकास थुनिएर बस्तीमा पस्दा नेपालगञ्ज– १० स्थित जनस्वास्थ्य कार्यालय पछाडिको बस्ती डुबानमा परेको छ । थुनिएको नालाको निकास खोल्न उपमहानगरपालिकाले तदारुकता नदेखाएकोे स्थानीयवासीको गुनासो छ । एशियाली विकास बैंकको अर्बौं ऋण सहयोग खर्च गरेर नगरभरि सडक र नाला बने पनि डुबान समस्या समाधान नहुँदा नेपालगञ्जवासी आक्रोशित भएका छन् ।

नगर प्रमुख डा धवलशम्शेर राणाले अर्को वर्षदेखि डुबानको समस्या नरहने प्रतिक्रिया दिनुभएको छ । “नाला सफा गर्ने मेशिन किन्दैछौँ, अर्को वर्षको वर्षात्अगावै नेपालगञ्जका सबै नाला मर्मत गरेर सफाइ गरिनेछ”, नगर प्रमुख राणाले भन्नुभयो ।

बाँकेको कोहलपुरमा ‘हरियाली अभियान’

बाँकेको कोहलपुरमा ‘हरियाली अभियान’ कार्यक्रम सञ्चालन गरिएको छ । कोहलपुर नगरपालिका–११ को चौबाटोदेखि दक्षिण चार लेन सडकको बीच भागमा रहेको ग्रीन बेल्टमा वृक्षरोपण गरी आजदेखि अभियानको शुरुआत गरेको छ ।

कोहलपुर नगरपालिकाका प्रमुख लुटबहादुर रावतले इन्द्रकमलको बिरुवा रोपेर हरियाली अभियानको शुभारम्भ गर्नुभएको हो । सो स्थानमा प्रत्येक पाँच मिटरको दूरीमा मुसुन्डा, इन्द्रकमल, क्रोटनलगायत प्रजातिका बिरुवा रोपन गरिएको छ ।

कोहलपुर नगरपालिकालाई हरित नगरपालिका बनाउने उद्देश्यले सञ्चालन गरिएको सो अभियानअन्तर्गत यो वर्ष एक हजार बिरुवा लगाउने नगर प्रमुख रावतले बताउनुभयो ।

नगरप्रमुख रावतसहित नगरपालिकाका प्रमुख प्रशासकीय अधिकृत दशरथ बुढा, कोहलपुर उद्योग वाणिज्य सङ्घका अध्यक्ष चक्रबहादुर अधिकारी, प्रधानमन्त्री रोजगार कार्यक्रमका संयोजक भद्र थापा, कोहलपुर नगरपालिकाका प्रेस सल्लाहाकार भीम रावतलगायतले सो स्थानमा वृक्षरोपण गर्नुभएको थियो ।

स्वास्थ्य सेवासम्बन्धी अभिमुखीकरण

कोहलपुर नगरपालिकाको संयोजन र स्वास्थ्य कार्यालय बाँकेको आयोजनामा कोहलपुर नगरपालिकाका वडाध्यक्ष, दलित महिला सदस्य र स्वास्थ्य चौकी प्रमुखका लागि स्वास्थ्य सेवासम्बन्धी दुईदिने क्षमता विकास तथा अभिमुखीकरण तालीम सञ्चालन गरिएको छ ।

सो दुईदिने अभिमुखीकरण कार्यक्रमका सहभागीलाई प्रभावकारी स्वास्थ्य सेवा प्रवाहका विधि र पद्दतिका बारेमा जानकारी गराइने नगर प्रमुख रावतले बताउनुभयो ।

स्वास्थ्य कार्यालय बाँकेका प्रमुख प्रेम केसीले अभिमुखीकरणबाट स्वास्थ्य सेवासम्बन्धी जिम्मेवारी तथा अधिकार, गुणस्तरीय आधारभूत स्वास्थ्य सेवाको महत्व, उपयोग र पहुँचमा अभिवृद्धि, तथ्यमा आधारित सहभागितामूलक स्वास्थ्य योजनातर्जुमा तथा पालिका र वडास्तरमा योजना तयार पार्ने प्रक्रियाका बारेमा सहभागीले जानकारी प्राप्त गर्नसक्ने बताउनुभयो । (रासस)


यो समाचार पढेर तपाईको प्रतिक्रिया के छ ?

प्रतिक्रिया दिनुहोस !