२३ फागुन, काठमाण्डाै । पेरिस सेन्ट जर्मेइन पिएसजीलाई कुल ५–२ ले हराउँदै रियल मड्रिड च्याम्पियन्स लिगको क्वार्टर फाइनलमा पुगेको छ । रियलको जितमा रोनाल्डो र कासिमिरोले दोस्रो हाफमा १–१ गोल गरे ।
दोस्रो हाफमा १० खेलाडीमा सिमित भएको पिएसजीका लागि इडिन्सन कभानीले गोल गरेपनि दोस्रो लेगमा रियल मड्रिड २ –१ ले विजयी भयो ।
पहिलो लेगमा हात पारेको ३–१ को जितका कारण केही सहज स्थितीमा रहेको रियल मड्रिडलाई पिएसजीले आफ्नो मैदानमा केही दवाव दिएको थियो ।
पहिलो हाफ गोल रहित बराबरीमा सकियो । ५१ औं मिनेटमा लुकास भाज्क्वेजको पासमा रोनाल्डोले गोल गर्दै रियल मड्रिडलाई अग्रता दिलाए ।
६६ औं मिनेटमा मिडफिल्डर मार्को भेराट्टी रातो कार्ड पाएर मैदानबाट बाहिरिएपछि पिएसजी १० खेलाडमा सिमित भयो । तर त्यसको पाँच मिनेटपछि इडिन्सन कभानीले गोल गर्दै पिएसजीलाई खेलमा फर्काउने प्रयास गरे ।
८० औं मिनेटमा कासिमिरोले गोल गरेपछि पिएसजीको यात्रा रोकिन पुग्यो ।
