अमेरिकी कार्यवाहक सहायक विदेशमन्त्री भोलि बुधबार नेपाल आउँदै Nepalpatra अमेरिकी कार्यवाहक सहायक विदेशमन्त्री भोलि बुधबार नेपाल आउँदै
१४ मंसिर २०७९, बुधबार

अमेरिकी कार्यवाहक सहायक विदेशमन्त्री भोलि बुधबार नेपाल आउँदै


एलिजाबेथ केनेडी ट्रुडो

काठमाडौँ । अमेरिकी कार्यवाहक सहायक विदेशमन्त्री एलिजाबेथ केनेडी ट्रुडो नेपाल भ्रमणमा आउने भएकी छिन् । अमेरिकी कार्यवाहक सहायक विदेशमन्त्री ट्रुडो भोलि बुधबार नेपाल भ्रमणमा आइपुग्ने अमेरिकी विदेश मन्त्रालयले जनाएको छ ।

ट्रुडो विश्वव्यापी सार्वजनिक मामिला हेर्ने अमेरिकी सहायक विदेशमन्त्री हुन् । १२ दिनको विदेश यात्रामा उनी नेपालपछि संयुक्त अरब इमिरेट्सको भ्रमण गर्ने छिन् । त्यसपछि उनले मध्य एसियाका उज्वेकिस्तान र किर्गिस्तानको पनि भ्रमण गर्ने अमेरिकी विदेश मन्त्रालयले जानकारी दिएको छ ।

भोलि बुधबारदेखि सुरु हुने उनको १२ दिने विदेश भ्रमणमा द्विपक्षीय सम्बन्ध र ‘रुस र चीनबाट फैलाइएका गलत सूचनाको प्रतिवाद’ गर्ने विषय प्राथमिकतामा परेको विदेश मन्त्रालयले जनाएको छ ।

अमेरिकी विदेश मन्त्रालयका उच्च अधिकारी ट्रुडोले नेपालमा रहँदा मिथ्या सूचना र लोकतन्त्रमा सञ्चारको भूमिकाबारे विभिन्न क्षेत्रका व्यक्तिसँग अन्तर्क्रिया गर्ने कार्यक्रम रहेको अमेरिकी विदेश मन्त्रालयले प्रेस विज्ञप्तिमा जनाएको छ ।

अमेरिकाले चीनले नेपालमा अमेरिकी परियोजनाविरुद्ध भ्रमपूर्ण सूचना फैलाएको आरोप लगाइरहेको छ । नेपाल भ्रमणमा आउन लागेकी अमेरिकी वरिष्ठ कूटनीतिज्ञ ट्रुडोले चीनका तर्फबाट अमेरिका र अमेरिकी मान्यताविरुद्ध फैलाइएका मिथ्या सूचनाको प्रतिवाद कसरी गर्न सकिन्छ भन्नेबारे छलफल गर्नेछिन् ।

पछिल्लोपटक नेपालमा अमेरिकाले अघि सारेको मिलेनियम च्यालेन्ज कर्पोरेसन (एमसीसी) परियोजनाबारे चीनले सामाजिक सञ्जाल र मिडियामार्फत भ्रमणपूर्ण सूचना दिएको आरोप अमेरिकाले लगाएको थियो । यद्यपि चीनले उक्त आरोप खण्डन गरेको थियो ।


यो समाचार पढेर तपाईको प्रतिक्रिया के छ ?

प्रतिक्रिया दिनुहोस !