बझाङमा राष्ट्रिय जनगणनाको तयारी तीव्र Nepalpatra बझाङमा राष्ट्रिय जनगणनाको तयारी तीव्र
५ आश्विन २०७८, मंगलबार

बझाङमा राष्ट्रिय जनगणनाको तयारी तीव्र


राष्ट्रिय जनगणना

बझाङ । बझाङमा जिल्ला जनगणना कार्यालयले ‘राष्ट्रिय जनगणना २०७८’ को तयारी तीव्र बनाउँदै सुपरीवेक्षकको तालिम सम्पन्न गरेको छ । स्थानीय तहमा जनगणना कार्यालय स्थापनको काम सम्पन्न भइसकेको छ भने १२ वटा पालिकामा सुपरीवेक्षक बुधबारदेखि खटिँदैछन् ।

कार्यालयका प्रमुख दिपेन्द्रसिंह धामीका अनुसार यही भदौ ३० देखि असोज १८ गतेसम्म सुपरीवेक्षकले स्थलगतरूपमा सूचीकरण गर्नेछन् । यसका लागि जयपृथ्वी नगरपालिकामा १०, बुङगल ११, मष्टा ५, तलकोट ५, साइपाल ३, थलारा ९, सुर्मा ३, केदारस्युँ ७, वित्थडचिर ५, खप्तडछान्ना ६, छविसपाथिभेरा ५ र दुर्गाथली गाउँपालिकामा ५ जना सुपरीवेक्षक खटिने छन् ।

सुपरीवेक्षकले सूचीकरणको समयमा स्थानीय तहका वडामा सामुदायिक प्रश्नावली भर्ने काम भने मूल जनगणनाको समयमा गरिने भएको छ । आगामी असोज १० गते जिल्लामा जनगणनका लागि करिब २६६ गणकको नतिजा सार्वजनिक हुने छ । गणकको नियुक्तिपछि एक सुपरीवेक्षकले चार गणकलाई परिचालन गरी गणना गर्नेछन् । गणकका लागि आगामी कात्तिक १३ देखि १७ गतेसम्म ५ दिने तालिम दिइने भएको छ ।

गणकले कात्तिक २५ देखि मङ्सिर ९ गतेसम्म जनगणना गर्ने उहाँले जानकारी दिनुभयो । जिल्लामा प्रमुख जिल्ला अधिकारी र स्थानीय तहमा प्रमुख प्रशासकीय अधिकृतको अध्यक्षतामा रहेको जनगणना समन्वय समिति गठन गरी काम अघि बढाइएको हो ।

गणकले गणना गरी ल्याएको तथ्याङ्कका आधारमा कार्यालयले मङ्सिर मसान्तसम्ममा काम सम्पन्न गर्ने छ । विसं २०६८ को जनगणना अनुसार बझाङको जनसङ्ख्या करिब एक लाख ९४ हजार रहेको छ ।


यो समाचार पढेर तपाईको प्रतिक्रिया के छ ?

प्रतिक्रिया दिनुहोस !
ताजा