ज्वाला संग्रौलाको बिहे नै किर्ते, सामाजिक अभियन्ता शब्दकै बेइज्जत Nepalpatra ज्वाला संग्रौलाको बिहे नै किर्ते, सामाजिक अभियन्ता शब्दकै बेइज्जत

२१ श्रावण २०७८, बिहिबार

ज्वाला संग्रौलाको बिहे नै किर्ते, सामाजिक अभियन्ता शब्दकै बेइज्जत


ज्वाला संग्रौला र हिमाल उपाध्याय

काठमाडौँ । आफूलाई सामाजिक अभियन्ता भनेर चिनाउने ज्वाला संग्रौला बिहे नै किर्ते भएको देखिएपछि सामाजिक अभियन्ता शब्दकै बेइज्जत भएको छ । ज्वाला संग्रौला दम्पतीको सरकारी कागजपत्र कीर्ते भेटिएको प्रहरी परिसर काठमाडौंले जनाएको छ । उनको सरकारी कागजात किर्ते गरेको देखिएपछि घटनाक्रमले नयाँ रुप लिएको छ ।

आफ्नी साथी भनिएकी खुश्बु घिमिरेलाई सामाजिक सञ्जालमा मनपरी लेखी समूह मिलेर गौशाला चौकीमा कुटपिट गरेपछि संग्रौला प्रहरी हिरासतमा पुगेकी थिइन् । प्रहरी परिसर काठमाडौंका अनुसार हिरासतमा राखेर अनुसन्धानका क्रममा संग्रौला दम्पतीको सरकारी लिखत कीर्ते गरेको प्रमाण फेला परेको हो ।

हिरासतमा राखेर खनतलासी गर्दै जाँदा संग्रौलाबाट जन्मदर्ता र उनका पति हिमाल उपाध्यायबाट नाता प्रमाणित र सम्बन्ध विच्छेदको कागज भेटिएको थियो । ती कागजपत्रलाई प्रमाणीकरण गर्न सम्बन्धित गाउँपालिकालाई पत्र लेख्दा फर्जी भेटिएको पाइएको जनाइएको छ ।

झापाकी संग्रौला र अछामका उपाध्यायको कागजात भिडाउने क्रममा पाँचथरको कागजात किर्ते पुष्टि भएको हो । प्रहरीले मंगलसेन अछामबाट समेत उनीसँग सम्बन्धित कागजात झिकाएको छ ।

संग्रौलाका पति उपाध्यायले चाहिँ नाता प्रमाणीकरणको पत्र कीर्ते गरिएको भेटिएको जनाइएको छ । प्रहरी परिसर काठमाडौंका अनुसार अछामको मंगलसेन नगरपालिकाबाट उपाध्यायको नाता प्रमाणीकरणको कुनै पत्र जारी नभएको देखिएको छ । यसबारे विस्तृत अनुसन्धान भइरहेको प्रहरीले जनाएको छ ।

प्रहरी परिसर काठमाडौंका अनुसार हाल संग्रौलासँग पाँचथरको एक गाउँपालिकाबाट जारी भएको जन्मदर्ताको प्रमाणपत्र रहेको छ । जुन ४ असार २०७४ मा जारी भएको जन्मदर्तामा गाउँ विकास समिति उल्लेख छ ।

गाविस खारेज भएर गाउँपालिका भइसकेको अवस्थामा शंका लागेर गाउँपालिकालाई पत्र पठाउँदा संग्रौलाको जन्मदर्तामा हस्ताक्षर भएका सचिवले पनि त्यसबेला गाउँपालिकामा काम गरेको नदेखिएको अनुसन्धानमा खुलेको जनाइएको छ ।

आफूमाथि रंगभेदी अभिव्यक्ति दिएपछि ट्राफिक प्रहरी वृत्त, महाराजगञ्जका असई मणिकान्त झाले पनि उनीविरुद्ध जाहेरी दिएपछि अहिले उनीमाथि अनुसन्धानका क्रममा कीर्ते गरेका कागजातहरु फेला परेको जनाइएको छ । यसबीच काठमाडौं प्रहरीले ज्वालालाई सरकारी कागजात किर्ते गरेको अभियोगमा जिल्ला अदालतमा मुद्दा पेश गर्ने तयारी गरेको छ ।

साथै अभद्र व्यवहारको कसूरमा कानुनमा एक वर्षसम्म कैद वा १० हजार रुपैयाँसम्म जरिवाना वा दुवै हुनसक्ने व्यवस्था छ भने जातीय तथा अन्य छुवाछूत र भेदभाव (कसूर र सजाय) ऐन, २०६८ अनुसार ३ महिनादेखि ३ वर्षसम्म कैद र ५० हजारदेखि २ लाख ५० हजार रुपैयाँसम्म जरिवाना हुनसक्ने प्रावधान रहेको छ ।

जापानमा बसेर सामाजिक सञ्जालमार्फत उग्र स्टाटस लेख्दै चर्चामा आएकी संग्रौला नेपाल आएर आफूलाई अभियन्ताका नाममा चिनाउँदै आएकी थिइन् । अभियन्ता बन्दै चर्का भाषण र गतिविधि गर्दै आएकी संग्रौलाको प्रहरी हिरासतमा लामै समय बित्ने देखिएको छ ।


यो समाचार पढेर तपाईको प्रतिक्रिया के छ ?

प्रतिक्रिया दिनुहोस !
ताजा