गुडिरहेको मोटरसाइकलबाटै नन्दकलीलाई बाघले थुतेर लगेपछि... Nepalpatra गुडिरहेको मोटरसाइकलबाटै नन्दकलीलाई बाघले थुतेर लगेपछि...
१५ फाल्गुन २०७७, शनिबार

गुडिरहेको मोटरसाइकलबाटै नन्दकलीलाई बाघले थुतेर लगेपछि…


गुडिरहेको मोटरसाइकलबाटै नन्दकलीलाई बाघले थुतेर लगेपछि सांकेतिक तस्वीर

काठमाडौँ । पूर्वपश्चिम राजमार्ग अन्तर्गत बर्दिया राष्ट्रिय निकुञ्जभित्र पर्ने नेपाली सेनाको अम्रेनी चेक पोष्ट नजिक गुडिरहेको मोटरसाइकलवाट बाघले १ जना महिलालाई थुतेर लगेको छ । हालसम्म ती महिलाको अवस्था अज्ञात छ । मोटरसाइकल उनका छोरा २२ वर्षीय सन्तोष थापाले चलाएका थिए ।

कैलाली लम्किचुहा नगरपालिका-४ की ५० वर्षीया नन्दकली थापालाई पाटेबाघले झम्टेर लगेको हो । गएराति करिब १० बजेतिर आमा र छोरा पूर्वबाट पश्चिम भुरीगाउँबाट चिसापानीतर्फ जाँदै गरेको सवार सु.प.प १००८ प. ६८०१ नम्बरको मोटरसाइकल सुस्त गतिमा गुडिरहेको अवस्थामा बाघले पछाडी बसेकी उनलाई आक्रमण गरेको बताइएको छ ।

बाघले मोटरसाइकलबाट आमालाई लगेपछि छोरा सन्तोष थापा भागेर निकुञ्जका सुरक्षाकर्मीलाई खबर गरेका थिए । उनलाई सामान्य चोट लागेको छ । उनकाे खोजीका लागि नेपाली सेनाको टोली, नेपाल प्रहरीको टोली र निकुञ्जको टोली खोजीमा खटिएको छ तर, फेला पार्न सकेकाे छैन ।

घटनास्थल पूर्वपश्चिम राजमार्ग अन्तर्गत निकुञ्जभित्र पर्ने नेपाली सेनाको अम्रेनी चेक पोष्टभन्दा करिब ५-६ किलोमिटर पश्चिममा रहेको छ ।


यो समाचार पढेर तपाईको प्रतिक्रिया के छ ?

प्रतिक्रिया दिनुहोस !