कोरोना संक्रमणवाट वरिष्ठ साहित्यकार प्रा. राजेन्द्र सुवेदीको निधन Nepalpatra कोरोना संक्रमणवाट वरिष्ठ साहित्यकार प्रा. राजेन्द्र सुवेदीको निधन

२० श्रावण २०७८, बुधबार

कोरोना संक्रमणवाट वरिष्ठ साहित्यकार प्रा. राजेन्द्र सुवेदीको निधन


प्रा. डा. राजेन्द्र सुवेदी

काठमाडौँ । वरिष्ठ साहित्यकार प्रा. राजेन्द्र सुवेदीको कोरोना भाइरस (कोभिड-१९) संक्रमणका कारण ७६ वर्षका उमेरमा आज बिहान निधन भएको छ । सुवेदीका श्रीमती, एक छोरा र तीन छोरी छन् ।

उनको केहीदिन यता शहीद गङ्गालाल राष्ट्रिय हृदयरोग केन्द्रको भेन्टिलेटरमा राखेर उपचार गरिएको थियो भने सोअघि ह्याम्स अस्पतालमा उपचार गरिएको थियो ।

विसं. २००२ साउन १९ गते पाँचथरको अमरपुरमा जन्मिएका सुवेदीले त्रिभुवन विश्वविद्यालयमा करिब ३७ वर्ष नेपाली विषय प्राध्यापन गरेका थिए । उनी समालोचक, निबन्धकार, उपन्यासकारका रूपमा परिचित छन् ।

सुवेदीका कविता, निबन्ध, प्रबन्ध समालोचना आदि गरी तीन दर्जन पुस्तक प्रकाशित छन् । त्रिभुवन विश्वविद्यालय केन्द्रीय नेपाली विभागका पूर्वप्रमुख, गोरखापत्र संस्थानका पूर्व अध्यक्ष तथा महाप्रबन्धक भएका थिए ।

सुवेदीका ‘विषय गहन : सतह चिन्तन’, ‘स्रष्टा सृष्टि : द्रष्टा दृष्टि’ समालोचना कृति, ‘सुद्युम्न’ र ‘स्वप्न संसार’ पौराणिक उपन्यास, ‘खाली सिसी पुराना कागज’ निबन्ध संग्रह, ‘धितो कोख’ उपन्यास लगायत कृति प्रकाशित छन् ।

त्यसै गरी सुवेदीले दर्जनभन्दा बढी कृति सम्पादन तथा अनुवाद, बनारसबाट प्रकाशित ‘मञ्जरी’ र समर्पण’ तथा ‘वाङ्मय’ पत्रिकाको सम्पादन गरेको प्राज्ञ नेपालले जनाए । सुवेदीका विरुपाक्ष, विरोचक, रासु उपनामबाट समेत लेख, रचनाहरू प्रकाशित छन् ।

नेपाल प्रज्ञा प्रतिष्ठानका सदस्यसचिव प्रा. जगत्प्रसाद उपाध्याय ‘प्रेक्षित’ ले सुवेदीको निधनले साहित्यका क्षेत्रले ऊर्जाशील व्यक्तित्व गुमाएको र अपुरणीय क्षति भएको बताए ।


यो समाचार पढेर तपाईको प्रतिक्रिया के छ ?

प्रतिक्रिया दिनुहोस !
ताजा