चीनले दिएको १८ हजार अक्सिजन सिलिण्डर तातोपानीमा, काठमाडौं ल्याउने तयारी Nepalpatra चीनले दिएको १८ हजार अक्सिजन सिलिण्डर तातोपानीमा, काठमाडौं ल्याउने तयारी
३१ जेष्ठ २०७८, सोमबार

चीनले दिएको १८ हजार अक्सिजन सिलिण्डर तातोपानीमा, काठमाडौं ल्याउने तयारी


अक्सिजन सिलिण्डर तातोपानीमा

काठमाडौं । नेपाल सरकारको पहलमा चीन सरकारबाट सहयोग प्राप्त १८ हजार अक्सिजन सिलिण्डर तातोपानी नाकामा आइपुगेको छ । उपप्रधानमन्त्री तथा कोभिड–१९ सङ्क्रमण व्यवस्था केन्द्रका संयोजक (सिसिएमसी) का संयोजक ईश्वर पोखरेलका प्रेस सल्लाहकार गणेश पाण्डेले सामाजिक संजाल फेसबुकमा लेख्दै सो जानकारी दिएका हुन् ।

चीनले दिएका १८ हजार खाली अक्सिजनका सिलिन्डर स्थलमार्ग हुँदै आज नेपाल आइपुगेका हुन् । पाण्डेका अनुसार तातोपानी नाकामा सिलिन्डर चीन सरकारले हस्तान्तरण गरेपछि काठमाडौँ ल्याइनेछ ।

सिलिन्डरको अभाव हुन थालेपछि सरकारले चीन सरकारबाट अनुदानमा २० हजार खाली सिलिन्डर ल्याएको हो । यसअघि ४०० सिलिन्डर नेपाल वायुसेवा निगमको वाइडबडी विमानबाट ल्याइएको थियो ।

१८ हजार आइसकेपछि बाँकी १६०० सिलिन्डर पनि जहाजबाट ल्याउने तयारी भइरहेको छ । यस्तै आजै चीनबाट ५५० अक्सिजन सिलिन्डर नेपाल वायुसेवा निगमको वाइड बडी विमानले ल्याउँदैछ । शनिबार सिलिन्डर ल्याउनका लागि जहाज चीन गएको थियो ।

शनिबार मात्र ओमानबाट गैआवासीय नेपाली सङ्घका सहयोगमा ५६० खाली सिलिन्डर आएको थियो ।कोभिड–१९ का सङ्क्रमितको उपचारका लागि अक्सिजन सिलिन्डरको अभाव हुन थालेपछि सरकारले विभिन्न मुलुकबाट सिलिन्डर ल्याउन थालेको हो ।

कोरोना संक्रमण बढिरहेको र हस्पिटलहरुमा अक्सिजन अभाव भइरहेको सन्दर्भमा सरकारले चीन लगायतका देशबाट अक्सिजन सिलिण्डरसहित स्वास्थ्य सामग्री आयातलाई प्राथमिकतामा राखेको छ ।

हस्पिटलहरुमा अक्सिजन र बेड अभाव हुन नदिन सिसिएमसी संयोजक पोखरेलको नेतृत्वमा सरोकारवालासँग निरन्तर छलफल भइरहेको पाण्डेले जानकारी दिए ।

कोरोना संक्रमितको उपचार, उपकरण तथा अस्पतालहरुको व्यवस्थापन र चिकित्सक तथा स्वास्थ्यकर्मीको प्रोत्साहनमा सरकार केन्द्रित रहेको उपप्रधानमन्त्री पोखरेलले बताए ।

नेपालस्थित चिनियाँ राजदूतावासले दुई दिनअघि सामाजिक संजाल फेसबुकमा लेख्दै चीनले सहयोग स्वरुप दिएको अक्सिजन सिलिन्डरको आगामी केही दिनमा काठमाडौं आइपुग्ने जानकारी दिएको थियो ।


यो समाचार पढेर तपाईको प्रतिक्रिया के छ ?

प्रतिक्रिया दिनुहोस !