९ जेठ, काठमाडौं । नेपालमा आज राती कोरोना भाइरस (कोभिड-१९) संक्रमण नयाँ ९ जनामा पुष्टि भएको छ । योसँगै नेपालमा कोरोना संक्रमितको संख्या ५१६ पुगेको छ । स्वास्थ्य तथा जनसंख्या मन्त्रालयका सह-प्रवक्ता डा. समीर कुमार अधिकारीले एक प्रेस विज्ञप्ति जारी गर्दै सो कुराको जानकारी दिएका हुन् ।
सह-प्रवक्ता डा. अधिकारीका अनुसार राष्ट्रिय जनस्वास्थ्य प्रयोगशाला काठमाडौ, वि.पी कोइराला स्वास्थ्य विज्ञान प्रतिष्ठान, धरान र किटजन्य रोग अनुसन्धान तथा तालिम केन्द्र, हेटौडामा गरिएको परीक्षणमा थप नयाँ ९ जनामा कोरोना पुष्टि भएको हो । जस अनुसार बारा, सप्तरी, भक्तपुर र मकवानपुर जिल्लामा संक्रमण पुष्टि भएको हो ।
आज साँझ थपिएकाहरुमा बारा जिल्लाको सिमरनगढ नगरपालिकामा २२, २७, ३०, ३४, ३८ र ४५ वर्षीय ६ जना पुरुषहरुमा कोरोना संक्रमण पुष्टि भएको हो । यस्तै सप्तरी जिल्लाको बलान-बिहुल गाउँपालिकामा ३५ वर्षीय पुरुष १ जना, भक्तपुरको भक्तपुर नगरपालिका-९ मा ४२ वर्षीया महिला १ जना र मकवानपुरको हेटौंडा उपमहानगरपालिका-३ मा ५४ वर्षीया महिला १ जनामा कोरोना पुष्टि भएको हो ।
यसअघि नेपालमा कोरोना संक्रमितको संख्या ५०७ थियो भने आज फेरि साँझ ९ जना नयाँ कोरोना भेटिएसंगै नेपालमा कोरोना संक्रमितको संख्या ५१६ पुगेको छ । नेपालमा कोरोनालाई जितेर अस्पतालवाट डिस्चार्ज भई घर फर्किनेको संख्या ७० पुगेको छ । नेपालमा अहिलेसम्म सिन्धुपाल्चोकमा १ जना र बाँकेमा १ जना र गुल्मीको १ जना गरी ३ जनाको मृत्यु भएको छ ।
यो पनि पढ्नुहोस्
नेपालमा संक्रमितको संख्या ५०७ पुग्यो, आज दिउसो थपिए कोरोनाका नयाँ २० संक्रमित
