, बझाङमा भारत आई क्वारेन्टाइबाट घर पठाइएका ६६ जनामा देखियो कोरोना संक्रमण

बझाङमा क्वारेन्टाइबाट घर पठाइएका ६६ जनामा देखियो कोरोना संक्रमण

बझाङमा भारत आई क्वारेन्टाइबाट घर पठाइएका ६६ जनामा देखियो कोरोना संक्रमण

बझाङ, साउन १७ । बझाङ जिल्लाको केदारस्यूँ गाउँपालिकाको क्वारेन्टाइनबाट घर पठाइएका ६६ जनामा कोरोना भाइरस (कोभिड-१९) संक्रमण पुष्टि भएको छ । हिजो शुक्रबार २५ जना र आज शनिबार ४१ जना गरी ६६ जनामा संक्रमण पुष्टि भएको हो ।

कोरोना संक्रमितहरु केदारस्यूँ गाउँपालिका-६ र ७ को थापागाउँ, भाटसैन, भामचौर, काँडाचौर र जसुडा लगायतका गाउँका स्थानीय बासिन्दा हुन् । उनीहरु सबै भारतबाट नेपाल फर्किएका भएको गाउँपालिकाले जानकारी दिएको छ ।

उनीहरु ८ देखि १२ दिन गाउँपालिकाले बनाएको क्वारेन्टाइनमा बसेपछि होम क्वारेन्टाइनमा बस्न भनेर गाउँपालिकाले नै घर पठाएको थियो । यद्यपि घर गएका संक्रमितहरु होम क्वारेन्टाइनमा बस्दा पालना गर्नुपर्ने नियमहरु बेवास्ता गर्दै सामान्य मानिस झैं समुदायमा घुलमिल भइसकेको स्थानीयले बताएका छन ।

एकै पटक ठूलो संख्यामा संक्रमितहरु भेटिएपछि वडा नम्वर ६ र ७ लाई पूर्ण रुपमा सिल गर्ने गाउँपालिकाले निर्णय गरेको छ । शनिबार बसेको गाउँ कार्यपालिकाको बैठकले गाउँपालिकामा पुन: लकडाउन गर्ने निर्णय समेत गरेको छ ।

गाउँपालिकाले वडा नम्बर ६ मा संक्रमण पुष्टि भएकाहरुलाई भाट्सैनमा रहेका चन्द्रोदय माध्यमिक विद्यालय र वडा नम्बर ७ काहरुलाई कैलाश भवानी माध्यमिक विद्यालयको आइसोलेसनमा राख्ने निर्णय गरेको छ ।

गाउँपालिकाभरि खाद्यान्न तथा दैनिक उपभोग्य बस्तुका पसलहरु बिहान ७ देखि १० बजेसम्म मात्रै खोल्न दिइने र एक वडाबाट अर्काे वडामा जानु पर्दा वडाध्यक्षको सिफारिस अनिवार्य हुनुपर्ने निर्णय गरिएको बताए ।

संक्रमितहरु समुदायमा घुलमिल भइसकेको हुनाले उनीहरुको कन्ट्याक्ट ट्रेसिङ गर्नलाई लागि स्वास्थ्यकर्मीहरु परिचालन गरिएको र संक्रमितहरुको सम्पर्कमा आएकाहरुको पीसीआर परिक्षण गर्ने तयारी भइरहेको गाउँपालिकाले जानकारी दिएको छ ।