यस्तो हुन्छ मेष राशिको समग्र जीवन Nepalpatra यस्तो हुन्छ मेष राशिको समग्र जीवन
११ मंसिर २०७८, शनिबार

यस्तो हुन्छ मेष राशिको समग्र जीवन


मेष राशि

मेष राशिमा तीन वटा नक्षत्र (अश्विनी, भरिणी र कृतिका) र नौ वटा अक्षर हुन्छन् – चु, चे, चो, ला, लि, लु, ले, लो, अ । नक्षत्रअनुसार मेष राशिका जातकको बेग्लाबेग्लै स्वभाव हुन्छ । मेष राशिमा जन्म भएका व्यक्तिको पुरुषको राशिस्वामी भौम, चर संज्ञक, पित्त प्रकृति, पूर्व दिशाको स्वामी र क्षेत्रीय वर्ण हुन्छ ।

मेष राशिको प्रतीक चिह्न भेडो हुन्छ । यस राशिको राशि स्वामी मंगल ग्रह हो । यो राशिचक्रको सबै भन्दा पहिलो राशि हो । धातु संज्ञक यो राशि चर राशि हो । मेष राशिका जातक सामान्यतया आकर्षक हुने गर्दछन् । यिनीहरुको व्यवहार कठोर र रुखो हुन्छ । सामान्यतया रुपरंग सुन्दर नै देखिन्छ ।

यिनीहरुलाई फकाएर वा सम्मान गरेरमात्र काममा लिन सकिन्छ, कसैको दबाबमा काम गर्न सक्दैनन् । यिनीहरुको चरित्र तथा आचरण सफा र आदर्शवादी हुन्छ, बहुमुखी प्रतिभाका स्वामी हुन्छन् । समाजमा राम्रो स्थान हासिल गरेका हुन्छन् र मानसम्मान प्राप्त गर्दछन् । हतारमा निर्णय लिने र फुर्सतमा पछुतो मान्ने गर्दछन् तर आफूले जिम्मा लिएको र थालेको काम नसिद्ध्याई विश्राम गर्दैनन् ।

त्याग र वैराग्यको भावना तुरुन्त सिर्जना हुन्छ र यदाकदा डिप्रेसनको सिकार पनि बन्न पुग्छन्, तर यिनमा काम, क्रोध, लोभ, मोह, तिर्सना आदि अवगुण पाइँदैन । अरुलाई सरसहयोग गर्न पाउँदा यिनीहरु प्रसन्न रहन्छन् । कल्पनाशक्ति प्रबल हुन्छ त्यसैले अधिकांश समय चिन्तन र सोचविचारमा बित्ने गर्दछ । आफ्नो जस्तो स्वभाव छ, यिनीहरु अरुलाई पनि त्यस्तै ठान्दछन् र त्यस्तै अपेक्षा गर्नाले सँगीसाथीबाट ठगिने सम्भावना पनि उत्तिकै हुन्छ ।

अग्नि तत्व भएका कारणले यिनीहरुलाई छिट्टै रिस उठ्छ र चुनौती, वादविवाद, झैझगडा र प्रतिस्पर्धासँग यिनीहरु कहिल्यै डराउँदैनन् । कुनै पनि चुनौतीलाई सामना गर्न हरदम तैयार रहने गर्दछन् । कसैले आफूलाई अपमान वा तिरस्कार गरेको छ भने यिनीहरु हत्तपत्त उक्त घटना बिर्संदैनन् र अवसर पाए भने प्रतिशोध साँध्न पनि बेर लाउँदैनन् । आफ्नो जिद्दीपन र निर्णयमा अडिनु यिनीहरुको विशेषता हो । त्यस्तै मेष राशिका जातकको हृदयमा एउटा कलाकार र प्रतिभा लुकेको हुन्छ ।

यिनीहरु आफूलाई सर्वोपरि ठान्दछन् र जुनसुकै काम गर्न पनि सक्षम हुन्छन् । यिनीहरु आफ्नो इच्छाअनुकूल अरुलाई हिंडाउन चाहन्छन्, त्यसैले यिनीहरुले कहिल्यै जस पाउँदैनन् र शत्रुको संख्या बढ्दै जाने गर्दछ । एउटै कामलाइै बारम्बार दोहोर्याइरहन यिनलाई मन पर्दैन । त्यस्तै एउटै पेसा वा व्यवसाय अथवा एकै ठाउँमा लामो समयसम्म यिनीहरु अडिन सक्दैनन् ।

सामान्यतया राम्रो र कुशल नेतृत्व क्षमता भएका, थोरै बोल्ने, हठी, स्वाभिमानी, क्रोधी, प्रेम र प्रणयको भावना व्यक्त गर्न नचाहने, नोकरचाकर र विपरीतलिंगीबाट सतर्क रहने, कर्मठ, प्रतिभाशाली, विज्ञान र प्रविधिको जानकार, यान्त्रिक कार्यमा दक्ष व्यक्तिको मेष राशि हुन्छ ।
 खगेन्द्र सुवेदी महर्षि भारद्वाज ज्योतिष केन्द्र


यो समाचार पढेर तपाईको प्रतिक्रिया के छ ?

प्रतिक्रिया दिनुहोस !