१५ बैशाख, काठमाडौँ । वरिष्ठ गायक दीपक खरेलको ‘माइ म्युजिकल ओडिसी’ गीतिसंग्रह सार्वजनिक भएको छ । सिएमडी फुडल्याण्ड, नक्साल, भाटभटेनी काठमाडौंमा कार्यक्रम आयोजना गरी खरेलको चौधौं एल्बम आइतबार सार्वजनिक गरिएको हो । वरिष्ठ गायक दीपक खरेलले ‘तिम्रो त्यो हसिलो’, ‘प्रतिक्षा गर’, ‘बादल बनाइदेउ’ लगायत थुप्रै गीतबाट चर्चा कमाउनु भएको छ । एल्बमका गायक दीपक खरेल, वरिष्ठ गीतकार राजेन्द्र रिजाल, डा. सनतकुमार वस्ती, गीतकार शीला खरेल, गीतकार विजय शिवाकोटी, संगीतकार साथै उपस्थित अन्य अतिथिले एल्बम लोकार्पण गर्नु भएको हो ।
उक्त एल्बममा समावेश गरिएका ७ वटा गीतहरुमा गायक खरेलको स्वर रहेको छ । जसमध्ये ‘जब जब तिम्रो सम्झना आउंछ’ र ‘रोज्नुसम्म रोजें’ गरी दुईवटा गीतमा उहाँकी धर्मपत्नी शीला खरेलको शब्द छ भने यी दुबै गीतमा हरि लम्सालको संगीत रहेको छ । तेस्रो गीत ‘तिमीले गरेका भुलहरु’ मा वरिष्ठ गीतकार राजेन्द्र रिजालको शब्द रहेको छन् भने उक्त गीतमा पनि हरि लम्साल कै संगीत रहेको छ । चौथो गीत ‘पुगेथं म टाढा उनी सम्झी आएँ’ मा रवि प्राञ्जलको शब्द रहेको छन् भने उक्त गीतमा किरण श्रेष्ठको संगीत रहेको छ ।
पाँचौ गीत ‘आकाशको कालो बादल’ मा वरिष्ठ साहित्यकार नरेन्द्रराज प्रसाईको शब्द रहेको छन् भने उक्त गीतमा हरि लम्साल कै संगीत रहेको छ । छैटौ गीत ‘तिमी गयौ मेरो जिन्दगीवाट’ मा वरिष्ठ गीतकार प्रकाश सायमीको शब्द रहेको छन् भने उक्त गीतमा प्रवीण बरायलीको संगीत रहेको छ । सातौ गीत ‘हर धड्कनमा सुरिलो लय होस्’ मा वरिष्ठ साहित्यकार डा. सनतकुमार वस्तीको शब्द रहेको छन् भने उक्त गीतमा मनमोहन थपलियाको संगीत रहेको छ ।
वर्तमान समयमा पश्चिमा संगीतको दबदबा बढ्दै गरेको परिप्रेक्षमा नेपाली सुगम संगीतको आवश्यकता वोध भएकोले युवामा प्रभाव पारी उनीहरुलाई नेपाली संगीतमा आकर्षित गर्न गायक खरेलले उक्त एल्बम बजारमा ल्याउनु भएको हो । गायकले एल्बममा रहेको ‘हर धड्कनमा सुरिलो लय होस्’ बोलको गीत गायनबाट एल्बम विमोचन कार्यक्रम उद्घाटन गर्नु भएको थियो । उक्त एल्बमका गीतहरु यसै साता गायकको युट्युबवाट सार्वजनिक हुने बताइएको छ । उक्त एल्बममा गायकको समधुर गायन, संगीतकारहरुको समधुर संगीत र भावनात्मक गीतहरुले श्रोताको मन अवश्य छुने देखिन्छ ।
